ليش مامنكون هيك قبل

أحلى تحية للجميييييييييييييييع

أنا اليوم بموضوعي في سؤال

انو نحنا منكون في ناس حولينا على طول عايشين معنا يلي هن أهلنا أمنا أبونا اخواتنا زوجك زوجتك أي فرد من أفراد العائلة على مر السنين مامنعود منحس بوجودن

يمكن لأنو صاروا جزء منا يمكن لأنو طول الوقت معنا يمكن بسبب الروتين

بس فجأة وقت يدق ناقوس الخطر وتحس انو حدى من أفراد هالعائلة في خطر على حياتو

هون منصير نحس بوجودو ونصير نحاول نعوضو عن الشي يلي فات مع انو ممكن يكون فات الأوان

طيب سؤالي انو ليش مو من قبل نكون بجنب بعضنا ليش مو من قبل تكون هالعلاقة متينة

ليش على طول منقصر بحق أهلنا وبس يفوت الأوان أو يدق ناقوس الخطر ساعتها منحس فيهم

ساعتها منحس انو هنن معنا

انتوا شو رأيكم

هاااااااااااااااااي للجمييييييييييييع

بالحقيقة بس في شغلة أنا حبيت عقب على هالموضوع هذا أنا ماكنت حابة أول ماكتبت الموضوع احكي سبب طرحي لهالفكرة بس هلأ انا بقدر قول سبب طرحي لهالفكرة هلأ

المهم أنا وقت ما طرحت هالموضوع لأني عنجد كنت عايشتها بكل تفاصيلها وخاصة وقت قلت هالجملة

بس فجأة وقت يدق ناقوس الخطر وتحس انو حدى من أفراد هالعائلة في خطر على حياتو

هون منصير نحس بوجودو ونصير نحاول نعوضو عن الشي يلي فات مع انو ممكن يكون فات الأوان

بالحقيقة أنا من قبل العيد كنت عايشة حالة من التوتر النفسي العنيف وفترة من الكوابيس يلي كانت اتداهمني بسبب خبر اصابة امي بسرطان الثدي هي عملت فحوصات عامة وقلها الدكتور انو لازم تعمل عملية بس امي صبرت شوي لأنو كانت ناطرة دكتور ليرجع من الحج هو دكتور كتير شاطر وهيك بتتأكد من النتيجة أكتر والحمدالله من حوالي ال3 أيام هو طمنها وقلها انو لاتخاف مافي شي ومابدك عملية هي مجرد كتل دهنية وقلها بس انو تراجعو كل كم شهر
بالحقيقة أنا ماقلت لأي حدى من رفقاتي عن هالموضوع بس قلت لانسانة وحدة أما الباقي فما قلت لحدى عن الموضوع مابعرف وقتها أنا ليش ماقلت

بس مو هون المهم أنا الشي يلي بدي قولو انو بهديك الفترة بقصد قبل مانعرف انو ماما والحمدالله سليمة اكتشفت قديش أنا انانية ومقصرة بحق امي وحاولت كتير اني عوض هالتقصير مو بس أنا يلي مقصرة أنا واثقة انو الكل مقصر واذا مو الكل 90%

طبعا تقصيرنا هذا مو بايدنا يعني بسبب ظروفنا ومشاغلنا بس عنجد أنا بتمنى انو ماحدى يقصر بحق أهلو حتى مايجي يوم ويحس انو فات الأوان أو انو تأخر عن التعويض

أنا تعلمت كتير من هالتجربة يلي كانت مرة بالنسبة الي بس بالمقابل تعلمت كيف ماكون مقصرة بحق أهلي يلي هنن أحق من أي شخص باهتمامي وعنايتي

أنا من كل كلامي هذا بس حبيت اني شارككم بهالتجربة حتى تستفيدو انتو كمان

وبعتذر عن الاطالة

مع خالص احترامي وتقديري